Tfatsoen
Vincoorde heeft veele teere knoppachtighe steelkens/ daer mede dattet op der aerden vliddert ende hier en daer cruypt/ daer aen wassen cleyn bladerkens/ meerder dan Bucxboom bladeren/ den Lauwer bladeren van coluere en fatsoene niet seer onghelijck maer veel mindere. Die bloemen zijn meest purpur blauw/ ende oock som wit maer selden/ elck in vijf bladerkens ghesneden/ der ghemeyne groote Ossentonghe bloemen wat ghelijck/ maer meerder ende liefelijcker/ nochtans oock sonder rueck. Die wortel es veeselachtich en geel.
Plaetse
Vincoorde wast gheerne in donckere vochtachtighe plaetsen/ aen canten van bosschen ende onder haghen en hegghen.
Tijt
Het bloeyt meest in Meerte en Aprill/ maer allen het iaer duer blijvet gruen.
Naem
In Griecx ende in Latijn wordt die cruyt Clematis daphnoides gheheeten/ ende van Plinius ter eender plaetsen Clematis Aegiptia/ ende ter andere/ Chamedaphne. In der Apoteken zoo heetet Pervinca en Vincapervinca. In Hoochduytsch y(n)grun en Singrun. In onser talen Vincoorde/ Ingroen ende Maechden palm. In Franchois du Lisseron.
Natuere
Vincoorde es drooghende en tsamen treckende van natueren.
Cracht en werckinghe
A Dit cruyt in wijn ghesoden ende ghedroncken stopt den loop des buycx/ ende gheneest dat roode Melizoen. Tstelpt oock die overvloedighe natuerlijcke cranckheyt der vrouwen/ dat bloet spouwen/ ende alderhande bloet ganck. |