[61] 3 Dat derde en alder cleynste Muer es den tweeden niet seer onghelijck/ maer in alder manieren veel mindere alzoo cleyn wesende dat zijn steelkens ghelijck draykens zijn ende zijn bladerkens ghelijck cleyne Thymus bladeren/ anders den voorschreven sonderlinghe den tweesten ghelijck.
4 Van desen Mueren wordt noch een andere vierde gheslacht ghevonden/ alleen in soute gronden wassende/ dat van gheknoopte stelen/ en bladeren/ den anderen Mueren sonderlinghe den tweeden ghelijck es/ maer sijn stelen zijn dicker/ corter/ ende die knoopen staen naerder by een. Die bladeren zijn dicker/ en die hauwkens en zijn niet lanckworpigh/ maer platachtich/ ront ende wat cantich/ ghelijck een groote erwte/ voortbringhende bruyn saet drije oft vier in een hauwken/ elck schier alzoo groot als een cleyn vitse.
Plaetse
Groote Muer wast in donckere en voch(t)achtighe plaetsen in die haghen en hegghen tusschen andere cruyden/ ende in ghelijcken plaetsen wassen oock die twee andere/ maer dat vierde en wast niet dan in soute gronden by der zee gheleghen.
Tijt
Dese cruyden bloeyen meest al in dmiddel van den zoomer.
Naem
1 Muer/ en sonderlinghe die groote Muer wordt in Griecx ende in Latijn gheheeten Alsine, ende van sommighen dees tijts Hippia maior. In die Apoteke es zy onbekent.
2, 3 Dat tweede en derde heet in die Apoteke Morsus gallinae en oock Hippia minor. In Hoochduytsch Voghelkraut/ en Hunderbisz. In Neerduytsch Voghelcruyt/ Hoenderbeet ende cleynen Muer. In Franchois Morgeline.
4 Dat vierde in die soute gronden wassende/ hebben wy Alsine Marina/ dat es zee Muer ghenaempt.
Natuere
Muer es cout en vochtich van natueren den Glascruyt seer ghelijck/ als Galenus schrijft.
Cracht en werckinghe
A Groote Muer es seer goet teghen die verhitheyt der ooghen ende alle hittighe sweeringhen/ der selver ghestooten en daer op gheleyt/ oft het sap van den selven/ daer op ghestreken. |