Tfatsoen
[143] Feyecruyt heeft seer ghesneden bladeren den bladeren van Coriander oft Roomsche Alsene ghelijck. Sijn stelen sijn ront hert en ghelijck die steel van Ruyte daer op bleeck geele bloemkens/ ende daer naer cleyne teere langhachtighe hauwkens wassen daer cleyn roodachtighe sadeken in besloten leyt. Die wortel es houtachtich lanck ende recht.
Plaetse
Fyecruyt wast ontrent den weghen op ongeboude plaetsen ende daer voortijts huysinghen ghestaen hebben/ ende daert eens ghesayet es daer comet lichtelijcken alle iaren van sijn selven voort.
Tijt
Dit cruyt beghint te bloeyen in Braeckmaent ende bloeyet tot in den Herfst toe/ en te wijle zoo leveret zijn saet.
Naem
Dit cruyt wordt gheheeten in Griecx Thalietron. In Latijn Thalietrum en Thalictrum en nu ter tijt Sophia. In Hoochduytsch Welsomen. In Neerduytsch Fyecruyt en root melizoen cruyt.
Natuere
Fyecruyt es verdrooghende sonder scerpheyt oft merckelijcke hitte. |