[224] Van desen tweeden gheslachte wordt oock een ghevonden/ dat rontsomme die geele hoofdekens geele bladerkens heeft/ in alder manieren van bladeren ruecke ende fatsoene den iersten ghelijck/ anders dan dat sijn bloemen heel geel sijn.
Beyde dese gheslachten van Camille die witte ende die geele hebben eenen seer liefelijcken rueck/ ghelijck die Citroen appelen rieckende/ daer naer dat sy hueren naem in Griecx Chamaemelum hebben.
3 Tderde gheslacht van Camillen dat roode purpure bloemen draeght ende hoogher dan die twee andere wast/ is noch ter tijt onbekent/ ten sy dat die bloemen diemen hier te lande Bruynettekens noempt/ dit selve derde gheslacht wesen/ die van stelen ende bladeren den Camillen niet seer onghelijck en sijn/ ghelijck in die naervolghende capittelen/ daer wy tselve bescryven selen/ blijcken sal.
Plaetse
Beyde dese gheslachten van welrieckende Camillen en wassen hier te lande van selfs niet/ maer worden in der cruytliefhebbers hoven gheplant/ ende sijn uut Spaengien ierst in dit landt ghecomen.
Tijt
Dese Camillen bloeyen in Braeckmaent ende in Hoymaent/ somtijts oock vroeger/ zy blyven tswinters over ende moghen die coude redelijck verdraghen.
Naem
Camille heet oock in Griecx Anthemis ende Chamaemelon. In Latijn Chamaemelum, ende als Apuleius scrijft Bene olens/ nu ter tijt Camomilla. In Franchois Camomille.
1 Dierste gheslacht wordt gheheeten in Griecx Leucanthemom. In Latijn Chamaemelum album. Hier te lande witte Roomsche Camille. Ende tot sommige plaetsen in die Kempen Appelcruyt.
2 Tweede gheslacht heet in Griecx Chrysanthemum. In Latijn Chamaemelum luteum. In Duytsch geele Roomsche Camille.
3 Tderde gheslacht wordt gheheeten in Griecx Heranthemum. In Latijn machment Chamaemelum purpureum/ ende in Duytsch roode Camille heeten.
Natuere
Camille ende sonderlinge die witte sijn werm ende drooge tot in den iersten graedt/ verdeylende ende subtijl makende/ van natueren.
Cracht ende werckinghe
A Die bloemen cruyt en wortelen van Camille ghesoden ende ghedroncken doen den vrouwen huer natuerlijcke cranckheyt comen/ iaghen af die doode vruchten/ doen die urine lossen ende den steen rijsen. Tselve doen zy oock alsmen in dwater badet daer zy in ghesoden sijn.
B Camille bloemen ende tcruyt met wijn ghesoden ende ghedroncken verdrijven die winden/ ghenesen dat colica dat is die pijne ende weedom der dermen ende des buycx.
C Camille in der selver manieren ghebruyckt suyvert ende maeckt schoone/ die van die geelsucht quade vervwe behouwen hebben ende gheneest die in die lever ghebreckelijck sijn.
D Camille met den bloemen ghestooten ende een vierendeel loots met wijn ingenomen is seer goet tseghen die beet van den serpenten en van allen fenijnnighen ghedierten.
E Camille in water ghesoden en van buyten op die blase gheleyt/ versuet die pijne ende weedom ende doet dat water ende tgraveel rijsen.
F Camille gheknouwt gheneest die sweeringhen des monts. Tselve doet zy oock alsmen met den water den mont spoelt daer zy in ghesoden is.
G Camille heylt oock alle oude wonden ende sweeringhen ende sonderlinghe die aen die hoecken van den ooghen comen/ ghestooten ende daer op gheleyt/ oft alsmen die selve wascht met den water daer Camille in ghesoden es. |