[247] Dese bloemen hebben langhe smalle bladeren/ den bladeren van Pareye schier ghelijck/ maer
niet zoo lanck/ daer tusschen wassen ronde stelen/ daer die schoone geele bloemen op voortcomen/ in sesse bladerkens ghelijck die Narcissen ghesneden in dmiddel een lanck ront hol clocxken draghende/ dat voor ghescaert ende ghekerft is. Naer die bloemen comen ronde bollekens voort daer saet in leyt. Die wortel is ront ayeuynachtich/ der wortel van den voorghescreven ghelijck.
Plaetse
Dese bloemen wassen in vochtighe plaetsen/ in donckere bosschen ende oock aen die canten van den velden/ ghelijck by Puers ende Bornehem daer zy overvloedich wassen zy worden oock tot veel plaetsen in die hoven gheplant.
Tijt
Dese bloemen bringhen haer bladeren stelen ende bloemen in Sporckelle voort/ ende bloeyen somtijts onder die snee. In Meert wordt het saet rijp. In Aprill ende Meye verdwijnet cruyt/ ende en wordt niet meer ghesien.
Naem
Dese bloemen worden gheheeten in Hoochduytsch geel Hornungsblumen/ dat is geel Sporckelbloemen/ van sommighen oock geel Tydeloosen/ ende heden daechs in Latijn onder die cruyt liefhebbers/ Narciscus luteus oft Pseudonarciscus/ om dat sijn bloemen/ van fatsoene den Narciscen wat gelijck sijn/ ende anders gheen namen en sijn ons noch ter tijt bekent.
Natuere
Geel Sporckelbloemen sijn werm ende drooghe/ van natueren den Narcissen seer ghelijck.
[248] A Tis by sekere experientie bevonden/ dat een half loot van desen wortelen noch versch wesende. In wijn oft water/ met wat Anijs saet oft Fenckel saet ende wat Gengebers ghesoden/ ende ghedroncken/ aftreckt/ ende duer den camerganck afiaecht/ die taye slijmachtighe fluymen/ ende die waerachtighe vochtigheden/ ende daer duer soo sijn die selve wortelen goet tseghen alle ghebreken ende sieckten uut taye fluymen oorspronck nemende.