[299] B Dille doet oock die opblasinghe winden ende crimpsel van den buyck/ vergaen/ stilt dat overgheven ende den camerganck/ ende doet die urine lossen in manieren als voor ghebruyckt.
C Dille es oock seer goet tseghen dat opsteyghen ende opclimmen van der moedere/ alsmense in water siedt/ ende den wermen damp daer af comende van onder ontfanckt.
D Tsaet van dille werm ghemaeckt ende dicwils gheroken/ doet den hick ende dat opsteyghen van der maghen stillen.
E Tsaet van Dille ghebrant gheneest die clieren ende fronselen in tfondament daer op ghestreken. Tcruyt al heel tot asschen ghebrant heylt ende gheneest die vochtighe sweeringhen sonderlinghe van den scamelijcken leden daer in ghestroyt.
F Dille in olie ghesoden verdeylt ende doet sceyden/ versuet alle pijnen/ verweckt tot slape/ ende brenght alle rouwe couwe ghezwellen tot rijpicheyt.
Hindernisse
Dille veel ghebruyckt maeckt doncker ende onclaer ghesichte ende verdroocht die natuere ende dat mannelijck saet. |