[331] ende drooghe tot in tbeghinsel van den derden.
Cracht ende werckinghe
A Tsap van der wortel van Peucedanum alleen/ oft als Plinius scrijft/ met bitter Amandelen ende Ruyte inghenomen es seer goet tseghen die cortheyt van den adem/ het versuet die pijne ende weedom des buycx/ het sceydt alle winden ende opblasinghen van der maghen/ ende alle inwendighe leden/ het doet die milte cleyn worden/ het maeckt saechten camerganck ende iaecht daer duer af die taye coude fluymen ende die heete geele cholerijcke vochtigheden.
B Tselve sap in der manieren als voor ghebruyckt doet oock water maken/ ende versuet die pijne ende weedom der nieren ende der blasen/ het verweckt die natuerlijcke cranckheyt der vrouwen/ het maeckt seer lichten ende veerdighen arbeyt ende het iaeght af die secondine ende die doode vruchten.
C Tsap van Peucedanum met een morw ey inghenomen gheneest den hoest.
D Tselve sap voor die nuese ghehouwen ende gheroken coemt seer te helpen den vrouwen die van dopclimmen vander moeder sieck sijn/ ende maeckt wacker die ghene die met den swaeren slaep bevanghen sijn.
E Tsap van Peucedanum met olie van Roosen ende azijn vermenght es seer goet tseghen die groote rasernie/ Phrenitides in Griecx gheheeten/ verouderde groote pijnen ende swijmelinghen in thooft/ swaere becommerlijcke ongheruste slapen/ ende tseghen die vallende sieckte op thooft ghestreken.
F Iten tselve sap in der manieren als voor ghebruyckt gheneest die lammicheyt/ cramp ende die vercrompen oft ghespannen zenuwen/ ende alle coude oude pijnen/ ende sonderlinghe die pijne vander hopen die men Sciatica heet.
G Tsap van Peucedanum op gloeyende colen ghebrant veriaecht met sijnen roock die slanghen en alle fenijnnighe cruypende dieren.
H Tselve sap in die gaten van den quaden tanden ghestreken beneempt die tantsweer/ ende met olie van Roosen vermenght versuetet die pijne der ooren daer in ghedruypt.
I Dit sap es oock seer goet op die ghescuertheyt der ionghe kinderen ghestreken ende op die hooch uutwassende navelen ghebonden.
K Die wortel van Peucedanum es den sape van werckinghen ghelijck maer niet heel zoo sterck/ ende noch tot allen den ghebreken daer tsap inghenomen goet toe es/ in water ghesoden worden ende zoo ghedroncken.
L Die selve wortel ghedroocht/ suyvert die oude vervuylde sweeringhen ende doet die quade scelferen van den beenderen lichtelijck sceyden ende bringht die open gaten tot sluyten daer in ghestroyet.
M Die wortel van Peucedanum es oock seer goet vermenght in alle salven ende plaesteren tot verwerminghe van eenich ledt des lichaems dienende.
N Die selve wortel van Peucedanum ghedroocht ende met olie van Dille vermenght verweckt dat sweet op tlichaem ghestreken. |