[333] uutghevende. Sy wast oock in Syrien/ Medien/ Armenien/ ende Lysbien/ maer der deser sap en es niet soo goet ende es seer onliefelijck van ruecke. Sy wordt oock in Duytschlant ende hier te lande in die hoven gheplant/ ende dese en gheeft gheen sap uut.
2 Dat ander wildt gheslacht die Gheraedt/ wast al om in die hoven ende graspleynen van selfs ende es een recht oncruyt. Ende waer dat beyde dese cruyden eens gheplant worden oft van selfs voortcomen/ daer blijven zy gheerne wassende/ ende bevanghen alle iaren meerder en meerder plaetse.
Tijt
Dese cruyden bloeyen hier te lande in Braeckmaent ende in Hoymaent.
Naem
1 Die oprechte Meesterwortel wordt gheheeten in Griecx Silphion. In Latijn Laser ende Laserpitium. Van sommighen als Dioscorides scrijft Magudaris/ sonderlinghe tghene dat gheen sap uut en gheeft als in Lybium ende hier te lande wassende/ dat nu ter tijt in die Apoteken ghenaempt wordt Osteritium Ostrition ende Ostrution/ van sommighen oock Laserpitium Germanicum. In Hoochduytsch Meysterwurtz/ ende daer naer hier te lande Meesterwortel.
Die stelen van dat oprechte Meesterwortel wordt ghenaempt in Griecx ende in Latijn Silphion.
Die wortelen Magydaris ende Magudaris.
Die bladeren Maspeton.
2 Dat ander wildt gheslacht wordt nu ter tijt gheheeten Herba Gerardi, Hetaphyllon ende Septifolium. In Duytsch Gheraerdt ende Sevenbladt ende mach wel Laserpitum sylvestre oft Laserpitium Nothum gheheeten worden.
Natuere
Meesterwortel sonderlinghe die wortel es werm ende drooghe tot in den derden graedt.
Dat wildt gheslacht es van ghelijcken natueren maer niet zoo sterck.
Cracht ende werckinghe
1
A Die wortel van dat oprecht Meesterwortel es seer goet als Dioscorides ende Galenus scrijven tseghen alle vergiftheyt gedroncken/ ende in spijse een luttel daer af oft met den sout ghebruyckt maeckt den adem welrieckende.
B Die bladeren van dit cruyt als Plinius scrijft in wijn ghesoden ende ghedroncken suyveren die moedere ende iaghen af die secondine ende die doode vruchten.
C Die wortel ghestooten ende met olie vermenght doet sceyden dat gheronnen bloet/ ende verdrijft die blauw gheslaghen oft ghestooten plecken/ gheneest ende doet verdwynen die croppen/ klieren/ ende alle herde gheswellen daer op gheleyt.
D Die selve wortel ghepoedert ende met olie van Lischwortelen ende was gemenghelt ende een plaester daer af ghemaeckt/ versuet ende gheneest die pijne van der hopen die men Sciatica heet.
E Die selve wortel met den scellen van Granaetappelen ende azijn ghesoden verdrijven die speenen/ wratten/ ende alle aenwassinghen van den eersderm. Tselve doen zy oock als zy in water ghesoden worden ende tfondament daer mede ghestooft wordt.
F Van onse ghemeyne Meesterwortel scrijven oock die medecijns die binnen corten |