[339] C Galbanum in der selver manieren ghebruyckt verweckt die natuerlijcke cranckheyt der vrouwen ende iaecht af die doode vruchten. Tselve doet zy van onder gheset/ oft ghebrant ende den roock van onder ontfanghen.
D Alle fenijnnighe ghedierten veriaeght oock Galbanum met sijnen reuck alst ghebrant wordt/ ende als yemant hier mede bestreken es zoo en kunnen gheen fenijnnighe ghedierten hen ghescaden. Die selve gumme met olie ende saet oft wortelen van Angelica doodet die slanghen ende serpenten als zy daer mede gheraeckt worden.
E Met sijnen rueck coemt Galbanum oock te helpen den vrouwe die van dopclimmen ende dat opsteyghen van der moeder sieck sijn/ ende den ghenen die met eenighe vallende sieckte beladen sijn/ het doet oock die moeder in sijn plaetse comen op den navel geleyt
F Galbanum vermorwet/ maeckt saecht/ ende treckt doornen ende splinters ende coude humueren uut ende es myts dyen seer goet ghebruyckt op alle herde coude oude clieren ende gezwellen/ ende in alle salven olien oft plaesteren vermenght die verwermen/ verteere/ doen sceyden/ vermorwen/ apostumatien uut doen breken/ ende doornen ende splinters uuttrecken.
G Op die herde verstopte milten es dese gumme oock seer goet gheleyt ende ghestreken ende op alle pijne ende weedom der sijden.
H Galbanum met edick ende salpeteer vermenght verdrijft dat sproet ende die vlecken des aensichts ende der huyt.
I Galbanum in die gaten van den tanden ghesteken versuet die pijne ende weedom der selver. |