[378] Roosewortel heeft drije oft vier stelen van die wortel spruytende/ daer aen wassen vette bladeren/ den bladeren van Wondecruyt aensienlijck/ maer smalder ende boven ghekerft. Die wortel es dick met veel aenhanghende veselinghen ende als sy ghebroken oft ghewreven wordt zoo rieckt zy ghelijck een Roose/ daer naer zy Roosenwortel ghenaempt es.
Plaetse
Roosewortel wast in Macedonien ende in Hungarien. Hier te lande wordt zy in der cruytliefhebbers hoven gheplant.
Tijt
Roosewortel bloeyet in Meye/ maer selden brenght zy bloemen voort.
Naem
Dit cruyt wordt gheheeten in Griecx Rhodia Rhiza. In Latijn Radix Rhodia, en Radix rosata. In Hoochduytsch Rosenwurtz. In Neerduytsch Roosewortel.
Natuere
Roosewortel ende sonderlinghe die in Macedonien wast es werm tot in den tweeden graedt ende subtijl van substantien.
Cracht ende werckinghe
Roosewortel met olie van Roosen ghemenght versuet die pijne ende weedom van den hoofde/ op voorhooft ende in den slaep van den hoofde gheleyt. |