[411] Laureola wast onderhalven voet oft meer hooch ende heeft vele tacken ende sijde scueten/ die niet lichtelijcken en breken als zy ghecrompt oft ghebogen worden ende met een dicke ende taeye scorsse bedeckt sijn/ aen die welcke meest boven aen dopperste wassen vele by een een dickachtighe doncker gruene bladeren van fatsoene den Laurus bladeren ghelijck maer niet zoo groot die gheknout/ die mont/ tonghe ende keele seer ontsteken. Die bloemen wassen op corte steelkens vast onder by naer tusschen die bladeren vele by een rontsomme den steel wit gruenachtich van coluere. Die vruchten sijn ierst gruen ende als zy rijp sijn swert ghelijck eenen bakeleere maer mindere. Die wortel es houtachtich ende lanck.
Plaetse
Laureole wast op rouwe boschachtighe plaetsen/ ende wordt ontrent den Maescant in tlandt van Luyck ende by Namen ghevonden.
Tijt
Laureole bloeyet seer vroech in Sporckelle/ ende in Meye zoo wordt huer saet rijp.
Naem
Dit cruyt heet in Griecx Daphnoides. In die Apoteken hier te lande Laureola. In Duytsch ende in Franchois Laureole.
Natuere
Dit cruyt es heet ende drooghe tot in den derden graedt volcomelijck makende schier den vierden graedt.
Cracht ende werckinghe
A Die bladeren van Laureola inghenomen maken camerganck ende iaghen daer duer af die taeye fluymen ende die waterachtighe
vochticheden ende sijn goet den watersuchtighen ghebruyckt. Tselve doen oock vierthien oft vijfthien corenkens tseffens inghenomen.
B Die bladeren van Laureola gheknout ende in die mont ghehouden trecken vele waeterachtighe vochticheyt uut den hoofde.
Ende in die nuese ghesteken zoo doen zy niesen.
Hindernisse
Laureola beruert die maghe seer ende onsteeckt verhit ende quest die inwendighe leden.
Beeteringh
Die bladeren van Laureola wordden ghebeetert ende bequaem ghemaeckt ghelijck die bladeren van Mezereon. |