[429] Swerte winde heeft roodachtighe effene seer dunne rancxkens gelijck dicke draeyen daer mede dat zy huer om boomen/ haghen/ staken ende alle cruyden die zy verreycken kan om wint. Die bladeren sijn den Veyl bladeren aensienlijck/ maer mindere ende dundere/ den bladeren van die Clocxkens winde seer ghelijckende. Die bloemkens sijn wit ende seer cleyn. Tsaet es swert ende drijecantigh gelijck tsaet van Bockweydt/ maer minder ende swerter/ seer veel by een wassende/ ende elck besonder saet leyt in een cleyn dun velleken besloten. Die wortel van desen es oock teer ende dun ghelijck een draet.
Plaetse
Swerte winde wast in die Wijngaerden ende aen die canten van den velden ende van den hoven aen die haghen ende tuynen ende tusschen hooghe cruyden.
Tijt
In Ooghstmaent ende Herfstmaent levert dese Winde huer saet/ ende daer naer vergaet zy.
Naem
Dese Winde heet in Griecx Helxine cissampelos/ ende van Constantinus die Keyser Malacosissos, hoc est, Mollis hedera. In Latijn van sommighen Convolvulus/ van sommighen anderen Vitealis/ dat es Wijngaerts winde. In die Apoteke Volubilis media. In Hoochduytsch Schwartz winde en Mittel winde. In Neerduytsch Swerte winde ende Middel winde.
Natuere
Swerte winde es werm van natueren ende verdeylende.
Cracht ende werckinghe
A Tsap van de bladeren van dese Winde ghedroncken maeckt camerganck.
B Die bladeren ghestooten sceyden ende verteeren die gheswillen daer op gheleyt als Galenus scrijft.