1Geelen huel heeft aschverwighe seer ghesneden ende ghecloven bladeren/ den bladeren van anderen Huelen niet seer onghelijck/ maer rouwer ende ghelijck die bladeren van Clapperroosen hayrachtich. Die stelen sijn ront ende oock wat hayrachtich/ ende daer op wassen geele bloemen van vier bladerkens/ die als zy vergaen voortbringhen langhe smalle gecromde hauwkens daer in tsaet leyt. Die wortel es groot ende dick ende blijft tswinters duerende ende brenght iaerlijcx nieuwe bladeren ende stelen voort.
Van desen geslachte van Huel worden noch twee andere soorten ghevonden/ als sommighe gheleerde scrijven die in Spaengien ghemeyn sijn.
2Deene es van bladeren ende stelen ende oock van hauwen in alle manieren den voorghescreven ghelijck/ alleen sijn bloemen en sijn niet geel maer schoon root/ anders van fatsoene den geelen bloemen ghelijck.
3Dat andere es oock den anderen ghelijck maer van bladeren/ stelen/ bloemen ende hauwen veel mindere. Ende die bloemen en sijn niet geel oft root/ maer schoon violet persch in vier bladerkens oock ghesneden.
[468] 1Geelen Huel wast van sijn eyghen natuere op rouwe plaetsen ontrent die canten van der zee als Dioscorides scrijft. Hier te lande wordt hy in der cruytliefhebbers hoven gesayet.
2Die andere twee gheslachten sijn in Spaengien ghevonden gheweest veerde van der zee/ op die corenvelden ende by den weghen.
Tijt
Geelen Huel bloeyet in Hoymaent ende Oostmaent.
Naem
Dit gheslacht van Huel wordt gheheeten in Griecx Mecon Ceratitis. In Latijn Papaver cornutum/ van sommighen ongheleerden Apotekers Memitha/ daert gheen ghelijckenisse mede en heeft. In Hoochduytsch Gehornter magsamen ende Geel olmagen. In onse tale Geelen huel. In Franchois Pavor cornu.
Natuere
Geelen huel es werm ende drooghe tot in den derden graedt.