[551] Dit cruyt heeft langhe smalle scerpe bladeren/ den bladeren van Riet seer ghelijck. Tusschen die bladeren wast eenen effenen calen steel/ sonder leden oft knoopen/ van binnen niet hol/ ende daer op wast een grauwe saechte dicke effene are oft dodde/ niet anders schijnende te wesene dan veel grauw wollachtighe hayrkens vast in een ghedronghen. Die ten laesten als die are rijp es met den winde wech stuyven/ die zoo saecht sijn datmen in sommighe landen daer mede die cussenen ende bedden vult/ als Leonhart Fuchs scrijft.
Plaetse
Dese Lischdodden wassen hier te lande in ondiepe staende wateren/ ende aen die canten van den grooten rievieren/ ende ghemeynlick tusschen dat Riet.
Tijt
Lisch dodden worden in Hoymaent ende in Ooghstmaent ghevonden.
Naem
Dit cruyt wordt gheheeten in Griecx Typhe. In Latijn Typha/ ende nu ter tijt Typha palustris/ tot ondersceet van dat ander Typha cerealis ghenaempt/ dat een gheslacht van Coren es/ daer af in tvierde capittel van desen boeck ende dit Cruijdeboeck deel ghescreven es/ van sommighen wordt dit cruyt oock ghenaempt Typha aquatica ende Cestum morionis. In Hoochduytsch Narrenkolben ende Lieszknospen. In Neerduytsch Lisch dodden ende/ Donsen. In Franchois Rouseau et Masses.
Natuere
Dit cruyt es cout ende drooghe van natueren.
Cracht ende werckinghe
A Die saechte wollachtighe hayrkens van den Lischdodde/ met verckens liese vermenght ghenesen die verbrantheyt daer op gheleyt.
