[567] Dese Distel heeft langhachtighe smalle bladeren over beyde seyden/ diep ghesneden ende met stekende dorenen beset/ den bladeren van Carlina seer ghelijck/ tusschen die welcke eenen rechten ronden dunnen steel wast/ ontrent eenen voet hoogh met ghelijcken bladeren becleet/ daer op aen dopperste drye vier oft meer ronde bollekens wassen/ rontsomme met stekende dorenen ghelijck die Castanie snoesteren beset/ ende dese bollekens gaen in dmiddel breet open/ rontsomme cleyne bleeckgeele bladerkens draghende/ ende dat es die bloeme. In somma dese bollekens met hueren dorenkens/ bloemen/ ende saet sijn van fatsoene den bollekens ende bloemen van Carlina seer ghelijck/ alleen veel minder ende bleecker naer tgeel treckende van verwen. Die wortel es dun/ van smaecke heet in den mont.
Plaetse
Dese Distel wordt hier te lande op ongheboude plaetsen ende by den weghen ghevonden.
Tijt
Dese Distel bloeyet in Hoymaent ende in Ooghstmaent.
Naem
Dese Distel wordt gheheeten in Hoochduytsch Dreidistel/ Frauwen distel und Seuw distel/ ende daer naer in Neerduytsch Dryedistel. Ende schijnt wel te wesene een maniere ende gheslacht van Carlina/ ende daer om hebben wy die selve Carlina sylvestris ghenaemt.