Dit cruyt es den Waterpepere van bladeren stelen ende in een ghedronghen bloemen seer ghelijck/ maer en es niet heet oft scerp/ maer meest sonder eenighen
[677] merckelijcken smaeck. Sijn stelen sijn ront ende gheknoopt. Die bladeren sijn lanck ende smal/ gelijck die bladeren van Waterpeper/ maer bruynder ende in dmiddel bruyne swertachtighe plecken hebbende/ de welcke die bladeren van dat Waterpeper niet en hebben. Die bloemen sijn lijfverwich oft root/ ende wassen oock in een ghedronghen/ ende daer naer volght bruyn breet saet. Die wortel es geel ende veeselachtich.
Plaetse
Dit cruyt wast oock in vochtighe neere plaetsen/ ende ontrent die canten van den wateren/ ende wordt dickwils by dat Waterpeper ghevonden.
Tijt
Dit cruyt levert sijn bloemen in Hoymaent ende Oostmaent/ ende corts daer naer sijn saet.
Naem
Dit cruyt wordt nu ter tijt in Latijn gheheeten Persicaria. In Hoochduytsch Persichkraut oder Flochkraut. In Neerduytsch Persick cruyt/ en van sommighen Vloocruyt.
Natuere
Persick cruyt es cout ende drooghe van natueren.
Cracht ende werckinghe
A Persick cruyt gruen ghestooten es goet gheleyt op die versche wonden/ want het vercoelt ende bescermt die selve van alle
verhittinghen ende apostumatien. Tselve doet oock dat sap van den bladeren daer in ghedruypt.