Deel 6 Van der boomen, haghen, ende alle houtachtighe gewassen, en van huerder vruchten, gummen ende sapen ondersceet, fatsoen, naem, natuere, cracht ende werkinghe PlantenAlfabetisch
[724] Desen Brem es den ghemeynen Brem niet seer onghelijck/ maer hy en wast zoo hoogh/ noch oock niet zoo recht op/ schier op der aerden ligghende/ hy heeft veel dunne rijskens van eenen houten steel voortcomende/ daer aen wassen vele smalle langachtighe bladerkens/ ende aen dopperste vele schoone geele bloemkens/ den bloemen van den ghemeynen Brem niet seer onghelijck maer mindere/ ende daer naer volghen smalle hauwkens/ ende daer in leyt plat bruyn saet. Die wortel es hert ghelijck van den anderen.
Plaetse
Dese Brem wordt ghevonden op leeghe onghebouwde plaetsen/ ende somtijts in vochtighe leemachtighen gront. Ende wordt ontrent Antwerpen ghevonden.
Tijt
Desen Brem bloeyet in Hoymaent ende Oostmaent/ oft oock noch spaeder/ ende corts daer naer wordt sijn saet rijp.
Naem
Dit cruyt es sonder twijfel een gheslacht van Brem/ ende daer om macht wel in Latijn gheheeten worden Genesta humilis. In Neerduytsch worddet ghenaemt Ackerbrem. Die Hoochduytschen maken daer af een Flos tinctorius/ ende heetent in huer spraeke Ferb blumen/ Geelserbblumen ende Heyden smuck.
Natuere
Dit cruyt es werm ende drooghe van natueren.
Cracht ende werckinghe
A Ackerbrem es van crachten ende werckinghe den ghemeynen Brem ghelijck/ maer niet heel zoo sterck.