In het voorgaende Boeck hebben wy die Ghewassen
beschreven, van de welcke de naemen in 't Latijn van de letteren
A. B. C. D. E. beghinnen, met sommighe andere die met de selve eenighe
ghelijckenisse van ghedaente oft wesen hadden; daerom sullen wy nu,
om onse beghonste schickinghe ende orden te volghen, in dit ons derde
Boeck die Ghewassen voort-brenghen, de welcke in 't Latijn naemen
hebben (daer sy meest mede bekent zijn) die van dese naevolghende
letteren F. G. H. I. K. L. beghinnen : met de welcke alhier oock
vele andere cruyden van ons beschreven sullen worden, die met de
selve eenighe ghemeynschap oft ghelijckenisse van ghedaente oft naemen
hebben. Van dese sal het eerste wesen dat cruydt, 't welckmen in
't Latijn Filipendula pleegh te noemen, ende in 't Duytsch Roode
Steenbreke.