Plantenfoto's

• Cruijdeboeck deel 1 capitel 4 Bladzijde 12

Tfatsoen

[12]   Echion heeft langhe rouwe en hayrachtighe bladeren/ der bladeren van anderen Ossentonghen seer ghelijck/ maer minder dan der ierster Ossentonghen bladeren. Sijn stelen zijn rouw en hebben seer veel aenwassende cleyne corte steelkes/ daer aen over beyde zijden veel cleyne/ smalle/ swertgruene scerpe bladerkens (die ten eynde vanden stelen seer cleyn zijn) ghelijck veerkens uutghespreyet wassen/ tusschen den welcken die bloemkens voortcomen die van coluere ierst licht peersch zijn/ ende als zy open ghegaen zijn hemelblauw worden/ ende van fatsoen lanchachtich/ hol/ met vier oft vijf peersche draykens daer in wassende/ den bloemen van den anderen Ossentonghen niet ghelijck dan alleen van coluere. Als die bloemen afghevallen ende gheresen zijn/ zoo vindtmen tsaet dat swert en cleyn es/ van fatsoene eenen slanghen hoofdeken ghelijck. Die wortel es recht ende lanckachtich/ van buyten root.

Plaetse

Dese wilde Ossentonghe wast in goede vette coren velden ende by den weghen/ ende andere goet lant ontrent Bruesssel/ Loven/ ende tot meer andere plaetsen.

Tijt

Dit cruyt bloeyt schier alle den soomer duer/ ghelijck die andere Ossentonghen/ ende levert te wijle zijn saet.

Naem

Dit cruyt wordt in Griecx ghenaempt Echion en Alcibiadion. In Latijn

• Cruijdeboeck deel 1 capitel 4 Bladzijde 13

[13]   Alcibiacum/ van Apuleius Theriorizon Echidnion in Griecx Viperma en Serpentaria in Latijn/ dat es in onse tale Slanghen cruyt/ hoe wel dattet alzoo niet ghenaempt en wordt/ maer groote wilde Ossentonghe gheheeten/ om dattet den anderen Ossentonghen van bladeren ghelijck es. Inder Apoteken eest onbekent.

Oirsaecke zijns naems

Dit cruyt heeft zijnen naem Alcibium en Alcibiadion/ naer den vromen Alcibius/ die alder ierst bate ende boete aen dit cruyt teghen die beten van den slanghen ghevonden heeft/ want als die oude Nicander schrijft: doen Alcibius slapende/ van een slanghe ghesteken was/ ontwakende ende dit cruyt vindende/ heeft het tselve in den mont ghenomen ende gheknaut/ ende tsap duer ghenomen/ ende het gheknaude cruyt op die wonde gheleyt/ waer duer hy tot ghesontheyt ghecomen es. Die andere naemen Echion/ Echidnion/ Viperma etc. die alzoo veel luyden als Slanghen cruyt/ die hevet ghecreghen om dattet teghen den beet van den slanghen seer sonderlinghe es/ ende dat zijn saet eenen slanghen hoofdeken ghelijck es.

Natuere

Dit cruyt es vander complexien van die andere Ossentonghen maer wat warmer/ en subtijlder.

Cracht en werckinghe

A   Die wortel van desen cruyde in wijn ghesoden ende ghedroncken/ coemt niet alleen te hulpen die van Slanghen ghesteken zijn/ maer oock bewaert ende bescermt den mensch dat hy van dien niet ghebeten en wordt/ alsmense te voren in deser manieren ghebruyckt. Dijsghelijcks cracht ende werckinghe hebben oock die bladeren/ ende dat saet.

B   Dit cruyt versaecht oock die pijne ende weedom der lendenen.

C   Item met wijn oft andersins inghenomen/ doet den vrouwen veel melcks crijghen.