Plantenfoto's

• Cruijdeboeck deel 1 capitel 34 Bladzijde 62

Tfatsoen

1   Muysooren es een neer meest lancx die aerde cruypende cruyt/ al om met dun en teer hayrken becleet/ anders den middelen Muer van fatsoene seer ghelijck/ want het heeft veel hayrachtighe stelen van eender wortel voortcomende/ die beneden rootachtich oft bruynroot zijn. Sijn bladerkens zijn lanc/ rouw/ hayrachtich/ den ooren van muysen seer ghelijckende/ hebbende een verheven ribbeken aen die onderste zijde. Die bloemkens zijn blauw oft wit. Die hauwkens zij lanck ghelijck aen het Voghelcruyt. Die wortel heeft veel veselinghen/ die als zy by een vergaert zijn/ wel eenen cleynen vingher dick tsamen zijn.

2   Noch ester een ander Muysoore die niet en es cruypende/ maer recht op staende/ tusschen andere cruyden wassende/ van stelen en bladeren den andere ghelijck/ maer meerder en van coluere wit/ met dun hayrachtich wolleken becleet/ vet int aentasten/ ghelijck oft zy met huenich bedauwt waere/ lymende aen die vinghers. Die bloemen wassen uut knoppekens ghelijck die andere. Die hauwkens daer tsaet in coempt zijn veel meerder/ den bollekens van Jenette bloemen schier ghelijck/ ende niet open ghelijck die Muysooren bollekens/ maer gheslooten.

• Cruijdeboeck deel 1 capitel 34 Bladzijde 63

Plaetse

Muysooren wassen onder die haghen ende aen die canten vanden velden ende by der straten/ ghelijck die Voghelcruyden.

Tijt

Dit cruyt bloeyet in Braeckmaent ende in Hoymaent.

Naem

Om die ghelijckenisse wille die de bladeren van desen cruyden met die oorkens vanden Muysen hebben/ zoo wordt dit cruyt in Griecx Myosota en in Latijn Auricula muris gheheeten/ dat es in Hoochduytsch Meuszorlin: in Neerduytsch Muysoore. In Franchois Oreille de souris.

Natuere

Muysoore es sonder eenighe hitte verdrooghende van natueren.

Cracht en werckinghe

A   Dit cruyt ghestooten es goet op die uutghebroken apostematien ende sweringhen die in die hoecken van den ooghen comen.

B   Van dese cruyde vindt men oock van de ouden Egiptiens gheschreven/ dat die/ ingaende die Ooghstmaent/ tsmorghens eer hy gesproken hadden/ met dit cruyt bestreken waeren/ dat hy dat iaer gheen leepe oft lekende ooghen hebben en souden.