[128] den bloemen van Eerdtbesien ghelijck/ naer den welcken rouwe bollekens wassen ghelijck aen die Hanevoeten ende Boterbloemen.
Plaetse
Dese cruyden wassen in stille staende wateren ende in die grachten.
Tijt
Fonteyn cruyt ende Vorschen beet/ bloeyen meest in Hoymaent. Die andere bringhen haer bloemen in Meye voort.
Naem
1 Dat ierste Swamcruyt/ wordt gheheeten in Griecx Potamogeiton ende Stachyites. In Latijn Fontalis en Fontinalis van sommighen Spicata. In die Apoteke eest onbekent. In Hoochduytsch Zamkraut. In Neerduytsch Fonteyn cruyt. In Franchois Espijn deaue.
2 Dat tweede en heeft in Griecx noch in Latijn gheenen naem die bekent es/ ende wordt van sommighen water Filieren gheheeten.
3 Tderde wordt Vorschen beet dat es Morsus Ranae gheheeten. In Griecx ende Latijn oock onbekent.
4 Die water Linsen heeten in Griecx Phacos/ en Phacos epy ton telmaton. In Latijn Lens palustris oft Lens Lacustris. In die Apoteke Lenticula aquae. In Hoochduytsch Meerlinsen. In onser talen Water Linsen en van sommighen Eyndegruen.
5 Dat vijfste van bloemen en sade den Boterbloemen ghelijck/ schijnt wel te wesene een gheslacht van Ranunculus oft Polyanthemon/ ende daer om zoo machment wel in Latijn heeten Polyanthemum palustre oft aquaticum/ in Duytsch witte oft water Boterbloemen. Die Apotekers nu ter tijt heeten dit cruyt Hepatica/ en Hepatica aquatica oft Palustris. In Duytsch Water Levercruyt.
Natuere
Fonteyn cruyt es van natueren vercoelende. Dijsghelijck oock Vorschen beet/ ende die Waterlinsen.
Cracht en werckinghe
1
A Fonteyn cruyt es goet gheleyt op die heete voorts etende vervuylde sweeringhen/ ende op die quade loopende gaten van den beenen/ met huenich ende azijn vermenght als Plinius scrijft.
B Fonteyn cruyt in wijn ghesoden es goet ghedroncken tseghen dat root melizoen ende alle loop des buycx/ ende es van crachten en werckinghe den Wechgras als Galenus scrijft ghelijck.
4
C Water Linsen/ met fijn tervwen bloemen ghemenghelt sijn goet gheleyt op heete ghezwillen/ op dwilt vier/ ende op tfledercijn. Tselve geneest oock die eersderm van den ionghen kinderen als hy te verde uuthanckt. |