Tfatsoen
[135] Duyvels beet heeft ronde stelen twee oft drije voeten hooch/ daer aen wassen langhe breedtachtighe bladeren rontsomme luttel oft niet ghekerft. Die bloemen sijn purperbruyn somtijts wit tsamen by een gheset ghelijck een rondt Hopbloemken/ ende als die af ghevallen sijn zoo vlieght dat saet wech. Die wortel es swert hert/ dick en cort met aenhanghende ter zyden veele faselinghen/ schijnende in dmiddel aen therte van der wortel afghebeten.
Plaetse
Duyvels beet wast op drooghe beempden/ in die bosschen ende by den weghen.
Tijt
Dit cruyt bloeyet meest in Ooghstmaent/ ende alst in sijn bloemen staet eest best om kennen/ want anders eest der Scabiosen oft Waterfilon wat ghelijck.
Naem
Dit cruyt wordt gheheeten in die Apoteke Morsus Diaboli/ in Hoochduytsch Teuffels abbisz/ in onser talen Duyvels beet/ in Franchois Mors de diable. Van sommigen nu ter tijt in Latijn Succisa/ ende anders gheene namen en sijn noch ter tijt bekent.
Natuere
Duyvels beet es werm en droogh van natueren ghelijck die Scabiosen. |