Tfatsoen
[138] Teucrium heeft bruyne steelkens/ ende daer wassende ronde gherimpelde rontsomme ghekerfte bladerkens/ den bladeren van Chamedrys daer hier voor int xx. cap. af ghescreven es seer ghelijck. Die bloemkens sijn cleyn bruyn root/ den bloemkens van Gamanderlijn ghelijck. Die wortel es wit ende veeselachtich.
Plaetse
Dit cruyt wast ende wordt ghevonden als Dioscorides scrijft in Cilicien/ hier te lande worddet in die cruyt liefhebbers hoven ghesayet ende gheplant.
Tijt
Dat hier te lande wassende es/ wordt met bloemen ghesien in Braeckmaent ende in Hoymaent.
Naem
Dit cruyt wordt gheheeten in Griecx Teucrion en Teucris/ in Latijn Teucrium. In die Apoteke eest onbekent. In Hoochduytsch worddet van sommighen gheheeten Grosz batengel/ dat es groot Gamanderlin.
Natuere
Teucrium als Paulus Aegineta scrijft es werm in den tweeden graedt ende drooge tot in den derden |