Plantenfoto's

• Cruijdeboeck deel 1 capitel 87 Bladzijde 161

Tgheslacht

Der cruyden van Dioscorides onder den naem Sideritis bescreven sijn drije gheslachten/ malcanderen seer luttel dan alleen van crachten ghelijckende.

Tfatsoen

1   Dat ierste gheslacht heeft rouwe hayrachtighe viercantige stelen/ en rouwachtighe bladeren den dooven Netelen niet seer onghelijck oft als Dioscorides scrijft den bladeren van Malrove ghelijck maer langher/ wat ghelijckende den Savie bladeren. Die bloemen wassen rontsomme den steel met croonkens ghelijck aen Malrove den bloemen van dooven Netelen van fatsoene ghelijckende/ maer mindere/ van coluere bruyn roodachtich of bleeck geel. Tsaet es cleyn ende swert. Die wortel dun ende geel.

2   Dat andere ende dat tweede gheslacht dat veele teere steelkens heeft ende bladeren den Varen ghelijck/ es dat cruyt dat nu ter tijt Osmunda gheheeten wordt/ daer af onder die Varenen bescreven zal worden.

3   Dat derde gheslacht van Sideritis met den Coriander bladeren ende roode teeren steelkens es dat Robrechts cruyt dat hier voor in xxviii. cap. onder die Oyevaertsbecken bescreven es.

Plaetse

Ledtcruyt wast in rouwe plaetsen ende in die wijngaerden somtijts oock by de haghen en tuynen.

• Cruijdeboeck deel 1 capitel 87 Bladzijde 162

Tijt

[162]   Ledtcruyt bloeyet in Hoymaent ende in Ooghstmaent.

Naem

1   Dat ierste gheslacht van desen cruyden heet in Griecx ende in Latijn Sideritis/ ende van sommigen als Dioscorides scrijft Heraclea/ nu ter tijt Sideritis prima. In Hoochduytsch Glidkraut. In Neerduytsch Ledtcruyt ende van sommigen Stinckaert. In Franchois Apparitoire.

2   Tweede gheslacht heet Sideritis altera/ het heeft oock meer andere namen die in cap. van Osmunda hier naer bescreven selen worden.

3   Tderde gheslacht wordt gheheeten Sideritis tertia/ ende van Cratevas oock Heraclea. Die andere namen sijn in xxviii. cap. bescreven.

Natuere

Ledtcruyt es meestendeel vochtich ende middelmatich cout/ nochtans niet sonder bitterheyt/ daer om oock afvaghende ende suyverende.

Cracht en werckinghe

Ledtcruyt ghestooten ende op die wonden gheleyt/ bewaert ende bescermt die wonden voor alle verhittinghen/ sweeringhen ende apostumatien/ stelpt dat bloeyen/ heylt ende gheneest die selve.