Plaetse
[176] Dit cruyt wast in die bosschen/ berchachtighe plaetsen ende op vette gronden.
Tijt
Dit cruyt bloeyet meest in Ooghstmaent.
Naem
Nu ter tijt wordt dit cruyt in Latijn gheheeten Virga aurea/ ende in onse tale/ Gulden roede/ ende anders gheen namen en sijn noch ter tijt bekent.
Natuere
Van smaecke es dit cruyt den Heydensch wondecruyt seer ghelijck ende daer om oock van natueren.
Cracht en werckinghe
A Gulden roede es oock een wondecruyt en heeft alle cracht van Heydensch wondtcruyt/ ende mach daer voor in alle saken daer dat Heydensch wondtcruyt goet toe es gebruyckt
worden.
B Gulden roede in wijn ghesoden ende ghedroncken es seer goet tseghen den steen sonderlinghe van den nieren/ ende doet den selven breken ende met dat water rijsen ende
afgaen. Tselve doet oock dat water van dit cruyt met wijn ghedistilleert ende een tijt ghedroncken. |