[239] Water Lisch heeft langhe smalle bladeren/ die smalder sijn dan die bladeren van geel Lisch/ ende tusschen dyen comen voort ronde effene rechte stelen/ sonder eenich ledt/ binnen voosachtich/ daer boven op wassen vele ronde knoppekens by een ghehoopt/ die schoone roode lijfvervwighe bloemkens worden in sesse ghesneden/ die wederom in ronde persche bollekens vergaen/ daer saet in voortcoemt dat seer cleyn is. Die wortel is wit dick knoopachtich met aenhanghende faselinghen.
Plaetse
Dit cruyt wast meest in die grachten ende staende wateren/ het wordt oock somtijts aen die canten van den Rivieren gevonden.
Tijt
Het beghint sijn schoone bloemkens in Meye voort te bringhene ende bloeyet van daeren voort tot in Ooghstmaent.
Naem
Dit cruyt wordt gheheeten in Griecx Spargamon ende Xiphidion. In Latijn Iris sylvestris. Van sommighen Scirpus. Hier te lande Lisch. In die Apoteke eest onbekent.
Natuere
Die smaecke van dit cruyt en van sijnder wortel bewijst dat het middelmatich van natueren is/ tot vercoelinghe treckende.
Cracht ende werckinghe
Die wortel van desen cruyde als Dioscorides scrijft/ is goet met wijn inghenomen tseghen fenijn van den serpenten.
