Plaetse
[290] Beyde dese Scharleyen worden hier te lande in die hoven gheplant/ ende dat ierste gheslacht es seer ghemeyn.
Tijt
Scharleyen bloeyen in Braeckmaent ende in Hoymaent een iaer nadat zy ghesaeyet sijn.
Naem
Scharleye heet in Griecx Horminum ende Geminalis.
1 Dat ierste gheslacht wordt nu ter tijt in die Apoteke gheheeten Gallitricum ende Centrum galli. In Hoochduytsch Scharlach. Hier te lande Scharleye. In Franchois Oruale ou Orualle.
2 Dat wildt gheslacht/ wordt nu ter tijt gheheeten Horminum sylvestre/ ende Gallitricum sylvestre. In Hoochduytsch wilder Scharlach ende van sommighen wilde Salbey. In Franchois Asparge saulvuage ou Oruale sauvage.
Natuere
Scharleyen sijn werm ende drooghe van natueren.
Cracht ende werckinghe
A Scharleye met spijse ghegheten oft ghesoden ende ghedroncken doet den vrouwen huer natuerlijcke cranckheyt comen/ ende maeckt lust tot byslapen.
B Tsap van Scharleye met huenich vermenght/ maeckt die ooghen claer ende geneest die donckerheyt/ daer in ghedruypt.
C Scharleye ghestooten oft in water ghesoden treckt die splinters ende doornen uut/ verteert ende doet scheyden alderhande gheswel daer op gheleyt. |