[303] gheel/ van smaecke den Peen dat es den gheelen wortelen niet seer onghelijck.
Plaetse
Dese Comijn wast als Dioscorides scrijft in Caria/ nu ter tijt worddet in Duytschlant op sommighe dorre beempden ghevonden. Hier te lande worddet in die hoven ghesayet.
Tijt
Witte Comijn bloeyet in Meye een iaer naer dat hy ghesayet es/ ende levert sijn saet in Braeckmaent ende Hoymaent.
Naem
Dit cruyt wordt gheheeten in Griecx Caros. In Latijn Careum oft Carum. In die Apoteke Carvi/ ende heeft dyen naem naer tlandt van Carien daert overvloedich wast. In Duytschlant heetet Weisz kimmel. Hier te lande Witte comijn. In Franchois Carvi ou Carotes.
Natuere
Tsaet van witten Comijn es werm ende drooghe tot in den derden graedt.
Cracht en werckinghe
A Tsaet van witten Comijn es der maghen ende den monde seer goet ende bequaem. het doet die spijse verteeren/ ende dat water ende urine rijsen/ ende het verdrijft alle winden ende opblasinghen van alle inwendighe leden. In somma het es den Anijs sade van crachten ende werckinghen ghelijck.
B Die wortel van desen Comijn ghesoden es oock goet gheten ghelijck die geel wortelen diemen tot sommighe plaetsen Peen oft Pooten heet. |