Dit cruyt es een seer teer ende cleyn cruydeken ontrent onderhalven voet hooch wassende. Sijnen steel es dun ende teer. Die ierste ende onderste bladeren sijn lanck over beyde sijden cleyn gesneden/ die opperste sijn den Venckel oft Dille bladeren aensienlijck maer veel mindere. Op dopperste van den stelen/ wassen cleyne croonkens voortbringhende ierst witte bloemkens/ ende daer naer cleyn grauw sadeken dat heet ende scerp in den mont es. Die wortel es dun ende teer.
Plaetse
Dit cruyt en wast hier van selfs niet/ maer wordt in der cruytliefhebbers hoven ghesaeyet.
Tijt
Het bloeyet in Hoymaent/ ende corts daer naer zoo leveret sijn saet.
Naem
Dit cruyt wordt gheheeten in Griecx ende in Latijn Sison oft Sinon. In die Apoteke
[316] eest onbekent. Sommighe gheleerde heeten dit cruyt cleyn Ameos/ die tselve voor een gheslacht van Ameos houdende sijn/ daer af men breeder in onse Latijnsche Annonatien bescreven sal vinden.
Natuere
Tsat van desen cruyde es werm ende drooghe tot by den derden graedt.
Cracht ende werckinghe
Tsat van Sison ghedroncken doet water maken/ ende es seer goet tseghen die droppelpisse/ het verweckt die natuerlycke cranckheyt der vrouwen/ het opent alle verstoptheyt van lever/ van milte/ van moeder ende van alle inwendighe leden.