[322] 1 Dat tam Peerlen cruyt heeft rechte dunne ronde houtachtighe stelen met aenwassende vele sijde scuetkens/ daer aen wassen langhe smalle scerpe swertgruene bladeren minder dan die bladeren van Wilghen. Tusschen die bladeren ende stelen wassen cleyne witte bloemkens voortbringhende schoon ront wit hert steenachtich saet/ cleynen peerlenkens ghelijck int aensiene. Die wortel es hert en houtachtich.
2 Dat Wildt gheslacht es van stelen bladeren ende bloemen den voorghescreven ghelijck/ alleen het saet en es niet soo wit ende effen/ maer wat gherimpelt ghelijck tsaet van die ghemeyne Ossentonghe/ ende die bladeren sijn wat rouwer.
3 Boven desen twee gheslachten vindtmen oock noch een ander wildt ende seer cleyn Peerlen cruyt/ daer af die hoochgheleerde Hieronymus Bock in sijnen cruydeboeck vermaent. Ende dit wast ontrent een spanne hooch met cleynen smalle bladerkens ghelijck tvlas becleet/ tusschen den welcken ende den stelen voortcoemt/ cleyn effen swert hert saet/ den witten tammen peerlen sade seer ghelijck.
Plaetse
1 Dat tam peerlen cruyt wast in sommighe landen op rouwe plaetsen/ hier te lande worddet in die hoven ghesaeyet.
2 Dat wildt op steenachtighe rouwe plaetsen ghevonden.
[323] Peerlen cruyden bloeyen in Braeckmaent/ Hoymaent ende Ooghstmaent/ ende tewyle leveren zy oock huer saet.
Naem
Peerlencruyt heet in Griecx ende in Latijn Lithospermon/ van sommigen Gorgonion. In die Apoteke Milium solis. In Hoochduytsch Meerhirsen. In Neerduytsch Peerlencruyt ende Steensaet. In Franchois Gremil/ ou herbe oux perles.
Natuere
Tsaet van Peerlencruyt es werm ende drooghe tot in den tweeden graedt.
Cracht ende werckinghe
A Tsaet van Peerlencruyt ghestooten ende met witten wijn ghedroncken breekt den steen/ ende doet den selven rijsen ende doet die urine lossen.