Calamus es een wortel ende van een geslachte van riet in Indien wassende die lanck gheknoopt ende wit es met vele ledekens
ondersceyden/ taeye ende heet alsmense knout.
Naem
Dese wortel heet in Griecx Calamos aromaticus. In Latijn Calamus odoratus. In die Apoteke naer den Griecxsen naem Calamus aromaticus. In Duytsch Calmus.
Natuere
Calamus es werm ende drooghe tot in den tweeden graedt/ nochtans meer drooghe dan heet als Galenus scrijft.
Cracht ende werckinghe
A Calamus ghedroncken doet water maken ende met saet van Eppe ghesoden es goet tseghen die droppelpisse/ ghebreken ende
pijne der lendenen ende der blasen/ ende tseghen dat waterladen/ ende dient seer wel den ghenen die van binnen ghequetst sijn.
B Die selve wortel es allen den inwendighe leden der maghen/ lever/ milte ende der moedere seer goet in alle manieren
ghebruyckt ende inghenomen.
C Calmus verweckt oock die natuerlijcke cranckheyt der vrouwen van binnen inghenomen/ van onder met een pessus ghesedt/ oft als die buyck daer mede ghestooft wordt.
D Tot den ouden hoest ende die borste te ruymen ende die taeye fluymen doen te rijpen dient oock seer wel dese wortel met huenich/ syrope/ oft suycker vermenght ende dicwils in den mont ghenomen.