Naem
[410] 1 Dat gheslacht van Hermodactilen dat hier ghefigureert es/ wordt in Griecx gheheeten Colchicum ende Ephemeron. In Latijn van sommighen Agrestis Bulbus. In Hoochduytsch Zeitlosen ende wisen Zeitlosen/ dat es Tydeloosen ende beempdt Tydeloosen. Hier te lande onder die cruytliefhebbers Hermodactilen. In Franchois Mort ou chien.
2 Dat ander gheslacht van der Apoteken/ wordt van Paulus Aegineta/ Mesue Serapio ende sommighe andere oude meesters gheheeten in Griecx ende in Latijn Hermodactilus/ ende met dyen naem eest oock in die Apoteken bekent.
Natuere
1 De ghemeyne Hermodactilen sijn quaet ende fenijnnich van natueren ende daer om oock zoo en worden zy in der medecynen niet ghebruyckt.
2 Die andere sijn werm ende drooghe tot in den tweeden graedt.
Cracht ende werckinghe
2 Die Hermodactylen diemen in die Apoteke ghebruyckt iaghen af duer den camerganck die taeye slijmactighe fluymen die selve uut den veerden leden halende/ ende sijn seer sonderlinghe goet tseghen dat fledercijn ende sciatica ende alle pijne der leden ghebruyckt.
Hindernisse.
1 A Die ghemeyne Hermodactilen inghenomen maken tlichaem vol iuecksels ghelijck oft vernetelt waere/ verbrant die maghe ende quetst die inwendighe leden alzoo dat ten laetsten bloedighen camerganck volght ende alzoo doodet den mensche.
2 Die ander Hermodactilen diemen in die Apoteke ghebruyckt maken walginghe ende winden ende berueren die maghe.
Beteringhe
2 Als tot den Hermodactilen die men in die Apoteke vint/ Gengebeer oft lanck peper/ saet van Anijs oft Comijn ende wat Mastix ghedaen wordt ende alzoo inghegeven/ zoo en selen sy die maghe niet seer berueren oft niet veel wints maken. |
