[463] Oleander es een boomachtich ghewas dat groote langhe dicke bladeren heeft die langher/ meerder/ dicker ende rouwer sijn dan die bladeren van Amandelboom. Die bloemen sijn schoon root in vijf bladerkens ghesneden eenen cleynen roosken niet seer onghelijck. Die vrucht es vinghers lanck ende es van binnen met rouw ghehayrt saet ghevult ghelijck die hauwkens van Swaluwe wortel.
Plaetse
Oleander wast in sommighe landen by die rivieren en aen die canten van der zee ende op schoone lustighe plaetsen als Dioscorides scrijft/ hier wordt hy in der cruytliefhebbers hoven ghevonden.
Tijt
Oleander bloeyet hier te lande in Braeckmaent.
Naem
Dit ghewas wordt gheheeten in Griecx Nerion Rhododaphne ende Rhododendron/ van Nicander oock Neris. In Latijn Laurus rosea ende Rosea arbor/ dat es/ Rooseboom. In die Apoteke ende onder die cruytliefhebbers Oleader.
Natuere
Oleander es oock seer heet ende drooch van natueren.
Hindernisse
Oleander es den menschen seer schadelijck ende sonderlinghe den scapen/ gheyten/ ossen/ honden/ esels/ muylen/ peerden ende alle viervoetighe ghedierten seer doodelijck/ want alle die water drincken daer Oleander in gheweyckt es sterven daer af terstont/ als Diosc