Plaetse
[512] Dravick wast op goede vette velden tusschen die Terwe/ ende somtijts oock tusschen die Gerste.
Naem
Dit oncruyt wordt gheheeten in Griecx Aera ende Thyaros. In Latijn Lolium nu ter tijt Zizania. In Hoochduytsch Dort. In onse tale Dravick. In Franchois Yvroye.
Natuere
Dravick es werm tot by naer in den derden graedt/ ende drooghe tot in den tweeden.
Cracht ende werckinghe
A Meel van Dravick ghemalen met sout ende die wortelen van Raphanus ghemenght bedwinght die voorts etende sweeringhen ende alle vervuylde quade ulceratien.
B Tselve meel met solfer ende azijn gheneest dat wildt vier ende quade ruydicheyt als sy daer mede bestreken worden.
C Dravick meel met duyven mest ende olie van Lijnsaet in wijn gesoden ende ghelijck een pappe op die clieren ende croppen
gheleyt/ doet die selve sceyden ende vergaen.
D Dravick meel treckt oock alle splinters ende dorenen uut/ ende doet die gheswillen ende apostumatien rijpen ende uutbreken.
E Dravick meel met huenich water/ oft als Plinius seyt met syrope van edick/ versuet die pijne van dat fledercijn/ ende van dat sciatica daer op ghestreken.
F Tselve meel met gansen smout opt voorhooft ghestreken versuet die pijne ende die weedom des hooft.
G Tes oock by experientie bevonden dat Dravick in bier ghedaen het hooft beruert ende dronckenscap maeckt. |