Tfatsoen
[518] 1 Die platte Erwten hebben platachtighe cantighe stelen/ daeraen wassen langhe smalle bladerkens/ altijt twee by een/ schier ghelijck twee hasen oorkens staende/ daer aen cleyne clauwierkens voortcomen/ daer mede dat sy huer aen die stocken ende rijs daer zy gheplant worden vast maken. Die bloemen sijn wit den bloemen van den ronden Erwten ghelijckende/ ende daer naer volghen platte breede hauwen/ daer in witte breede vruchten voortcomen die plat ende ghekant sijn ende ongelijcke hoecken hebben/ van smaecke den Erwten volnaer ghelijck. Die wortel es teer ende faselachtich.
2 Die cleyne platte Erwten sijn den voorghescreven van stelen/ bladeren ende hauwen ghelijck. Die bloemen sijn roodachtich. Die vruchten sijn oock plat/ cantich ende hebben onghelijcke hoecken ghelijck die groote/ maer sijn minder/ herder ende bruynder van verwen naer tswert treckende.
Plaetse
Dese Legumina worden hier te lande by sommighe neerstighe cruytliefhebbers ghevonden.
Tijt
In Braeckmaent bloeyen dese Legumina ende worden in Hoymaent ende Ooghstmaent rijp.
Naem
1 Dat ierste ende groot gheslacht wordt gheheeten in Griecx Lathyros. In Latijn van Columella ende Paladius Cicercula.
2 Dat tweede es ghenaempt in Griecx Aracos. In Latijn Cicera. In Duytsch oft Franchois en hebben zy gheen namen/ noch oock in die Apoteke/ want daer sijnse onbekent.
Natuere ende cracht
1 A Dat ierste gheslacht es van natueren den Erwten ghelijck ende voedet oock redelijck dat lichaem als Galenus seyt.
2 B Dat tweede es den iersten oock ghelijck als die selve Galenus scrijft/ anders dan dattet herder es/ ende daer om/ meer tijts behoeft alst ghesoden wordt. |