[527] heeft bladeren/ ghelijck die bladeren van wilden Vitsen/ maer wat smalder/ witter ende saechter. Sijn bloemen wassen oock aen langhe steelkens veel by een/ ende sijn van verwen meest schoon licht root/ ende als die vergaen zoo volghen daer platte rouwe ruyghe rondachtighe hauwkens naer/ somtijts ghelijck een cleyn egelken gefatsoeneert/ dwelck dat saet sijn.
Plaetse
1 Die wilde Vitsen groeyen aen die canten van den velden in die beempden ende dicwils in vochtighe plaetsen ende ontrent die waterloopen.
2 Dat ander gheslacht wordt voor een nieuwicheyt van den cruytliefhebbers hier te lande in die hoven gheplant. Men seyt dattet aen die canten van der zee/ op die duynen ende dyerghelijcke ongheboude plaetsen overvloedich voortcoemt.
Tijt
1 Die wilde Vitsen bloeyen meest in Braeckmaent/ ende corts daer naer zoo leveren sy huer saet ende hauwen.
2 Dat ander cruyt bloeyet in Hoymaent/ ende levert oock te wyle sijn saet.
Naem
1 Dierste gheslacht es sonder twijfel/ oock een maniere van Crock/ ende mach oock wel Arachus ghenaemt/ ende voor een geslacht van Arachus gehouden worden. In Hoochduytsch worddet gheheeten wilder Wicken. Hier te lande wilde Vitsen. In Franchois Vesce saulvage.
2 Dander cruyt wordt van sommighen ghehouwen voor Onobrychis/ ende van sommighe andere voor Glaux marina.
Cracht ende werckinghe
1 Die wilde Vitsen en sijn niet beeter dan Crock/ ende daer om zoo dienen zy oock alleene/ tot voederinghe van den beesten ghelijck andere oncruyden.
2 Es dat ander gheslacht Glaux oft Onobrychis/ zoo salmen zijn cracht bescreven vinden hier voor/ in die Capittelen van Glaux oft Onobrychis. |