Tijt
[536] Claveren bloeyen in Meye ende in Braeckmaent ende dicwils oock alle den zoomer duer.
Naem
Dese Claveren worden ghenaempt in Griecx Triphyllon chortocopyon. In Latijn Trifolium pratense. In Hoochduytsch Wisen klee und Fleyschblumen. Hier te lande Claveren ende ghemeyn Claveren. In Franchois Treffle.
Natuere
Claveren sijn cout ende drooghe van natueren/ als aen hueren smaeck goet te mercken es.
Cracht ende werckinghe
A Die Claveren met hueren bloemen oft alleen in huenich water oft wijn ghesoden ende ghedroncken versueten ende ghenesen
die heete ende scerpe stekende pijnen van den dermen. Tselve doet oock dat water daer zy in ghesoden sijn van onder met een clisterie gheset.
B Claveren oock in water ghesoden ende eentijt van daghen ghedroncken stelpt die witte vloet van den vrouwen.
C Die bloemen ofte bladeren van Claveren met olie gesoden doen die heete bloetsweeren ende andere dyerghelijcke gheswillen rijp worden ende uutbreken oft somtijts oock sincken ende vergaen daer op ghelijck een plaester gheleyt wordt. |