Coecoecksbroot es een neer cruyt gheen stelen hebbende. Sijn bladeren wassen van der wortelen op corte steelkens die als zy ierst uutcoemen tsamen ghevouden sijn/ ende daer naer zoo onsluyten sy huer ende worden schoon gruen/ ende den Claverbladeren schier ghelijck van fatsoene/ behalven alleen
[545] dat elck blat in dmiddel eenen diepen kerf heeft. Tusschen die bladeren op corte steelkens oock van der wortele comen die bloemkes voort/ ghefatsoeneert schier ghelijck cleyne scellekens/ van verwen wit met purpure aderkens duertrocken. Ende als die afvallen/ zoo comen daer cleyne scerpe huyskens met geel saet ghevult. Die wortel es bruyn root ende lanck.
Plaetse
Dit cruyt wast hier te lande in sommighe donckere bosschen/ ontrent die wortelen van grooten boomen/ ende somtijts oock aen die canten van den grachten.
Tijt
Dit cruyt bloeyet in den Aprill ende in tbeghinsel van den Meye.
Naem
Dit cruyt wordt gheheeten in Griecx ende in Latijn Oxys. In die Apoteke Alleluya/ van sommighen Trifolium acetosum ende Panis cuculi. In Hoochduytsch Saurerklee/ Buchklee/ Buchampffes/ Buchbroot/ Gauchklee/ ende Guckgauchklee. Hier te lade Coecoecksbroot. In Franchois Pain a coquu.