[593] Die wilde zee Koolen sijn van bladeren stelen ende bloemen den Slooren ende cleynen Rooden koolen van fatsoene seer ghelijck/ maer die bladeren ende stelen sijn witter/ ende meer hayrachtich/ ende van smaecke veel bitterder.
Plaetse
Dese Koolen wassen op rouwe hooghe plaetsen ontrent die canten van der zee als Dioscorides scrijft. Ende wordden in Zeelant op die hooghe dijcken ende duynen tot veel plaetsen ghevonden.
Naem
Dit gheslacht van Koolen wordt gheheeten in Griecx Crambe agria/ ende van sommighen Halmiridia. In Latijn Brassica sylvestris ende Brassica rustica. Hier te lande Zee koolen/ ende wilde Zee koolen/ ende daer naer nu ter tijt oock Caulis marinus ende Brassica marina, hoe wel dattet niet en es die Brassica marina van Dioscorides bescreven/ daer af wy in tderde boeck onder die Winden ghescreven hebben.
Natuere
Dese koolen sijn seer werm ende drooch van natueren/ ende veel stercker dan die Tamme koolen.
Cracht ende werckinghe
A Die wilde Zee koolen sijn van crachten ende werckinghe den tammen ghelijck/ maer veel stercker ende meer afvagende/ ende daer om en dienen sy oock niet als spijse ghebruyckt.
B Die bladeren van desen koolen ghestooten/ ghenesen ende heylen die versche wonden ende doen sceyden die gheswellen daer op gheleyt.