[611] Die wilde Lattouwe heeft langhe ende over beyden sijden diep ghesneden witachtighe bladeren/ die van onder lancx die middelste ribbe met veel stekende dorenen beset sijn. Die steel es ront/ lanck/ ende hoogher wassende dan aen die tamme Lattouwen/ rouw/ met stekende dorenen/ ende ghelijcken bladeren becleet/ aen dopperste van den stelen wassen die bloemen ghelijck aen die tamme Lattouwen/ ende daer naer dat saet dat bruyn es/ anders den sade van tammen Lattouwen ghelijck. Die wortel es cleyn.
Plaetse
Dit cruyt wast aen die canten van den velden/ by den weghen ende dijsghelijcken onghebouden plaetsen/ somtijts oock in die moeshoven/ ende daert eens ghesayet es/ daer comet lichtelijcken alle iaren wederom van selfs voort.
Tijt
Dese Lattouwe bloeyet in Hoymaent ende Oostmaent.
Naem
Dit cruyt wordt gheheeten in Griecx Thridax agria. In Latijn Lactuca sylvestris/ van Zoroastres Pherumbrum. In die Apoteke Endivia/ hoe wel nochtans dattet gheen oprechte Endivie en es. In Hoochduytsch Wilder Lattich. In Neerduytsch Wilde Lattouwe. In Franchois Laictue sauvage.
Natuere
Die wilde Lattouwe es eendeels van natueren cout ende drooghe tot in den derden