[623] Sigmaerts cruyt es van den gheslachte van den wilden Maluwen/ als Dioscorides seyt/ maer sijn bladeren sijn meer ghecloven ende dieper ghesneden/ ende in veel deelen verdeylt/ schier ghelijck die bladeren van Verbena maer veel meerder. Die stelen sijn ront ende wassen recht op ontrent twee oft drije voeten hoogh/ ende daeraen groeyen licht roode oft lijfverwighe bloemkens/ den bloemen van anderen Maluwen van fatsoene ghelijck/ naer den welcken dat saet oock ghelijck keeskens gheformeert voortcoemt. Die wortel es dick/ twee voeten oft meer lanck/ van binnen wit.
Plaetse
Dit cruyt wast op sommighe ongheboude plaetsen aen die canten van den velden ende aen die haghen/ ende en es hier te lande niet seer ghemeyn.
Tijt
Sigmaerts cruyt bloeyet in dmiddel van den zoomer/ ghelijck die wilde Maluwen.
Naem
Dit cruyt wordt gheheeten in Griecx Alcea/ ende dijsghelijck oock in Latijn. In die Apoteke eest onbekent/ van sommighen/ Herba Simeonis. In Hoochduytscg Sigmarskraut/ Sigmundswurtz/ oder Hochlenten. In Neerduytsch Sigmaerts cruyt.In Franchois Guimaulve saulvage.
Natuere
Sigmaerts cruyt es middelmatich in wermte ende coude/ ende wat drooghe van natueren.
Cracht ende werckinghe
A Die wortelen van desen Sigmaerts cruyde in water oft wijn ghesoden/ ende ghedroncken/ stelpen dat root Melizoen/ ende
heylen ende ghenesen die ghequetstheyt ende ghescuertheyt van binnen. |