Meloenen cruypen lancx der aerden ghelijck die Concommeren/ ende hebben teere stelen met aenwassende cleyne clauwierkens/ ende rondachtighe rouwe bladeren. Die bloemen sijn geel ghelijck die bloemen van Concommeren. Die vruchten sijn lanck den Concommeren oock schier ghelijck/
[630] maer dicker/ van buyten met dun hayrken becleet/ sonderlinge als sy noch ionck sijn/ en van binnen geel. Ende daer in leyt dat saet den Concommersade seer ghelijck.
Plaetse
Meloenen worden oock in die hoven ghesaeyet/ ende moet gheplant worden in goede vette ghemeste aerde/ op drooghe plaetsen/ ende daer die sonne veel ende sterckelick schijnt/ want anders en comen sy hier te lande niet voort.
Tijt
Meloenen worden in Oostmaent ende Herfstmaent rijp.
Naem
Dese vrucht wordt gheheeten in Griecx van Galenus Melopepon. In Latijn Melopepo/ nu ter tijt Melo. In Hoochduytsch Melonen. In Neerduytsch Meloenen. In Franchois Melons.
Natuere
Meloenen sijn den Pepoenen van natueren schier ghelijck/ maer niet zoo vochtich als Galenus scrijft.