[648] Die vremde Peterselie heeft breedachtighe bladeren in veel deelen verdeylt die over beyde sijden diep ghesneden ende rontsomme gekerft sijn. Die stelen sijn dun ende wassen ontrent twee voeten hoogh/ ende daer op comen voort cleyne croonkens voortbringhende witte bloemkens/ ende daer naer cleyn saet dat bruyn es/ den sade van ghemeyne Peterselie niet seer onghelijck/ maer beeter ende meer Aromatijck van ruecke/ ende scerper van smaecke. Die wortel es dun/ ende heeft vele aenhanghende faselinghen.
Plaetse
Dese vremde Peterselie wast veel in Macedonien op steenachtighe rouwe ongheboude plaetsen/ ende oock tot sommighe plaetsen in Duytschlant. Hier te lande wordt sy in der cruytliefhebbers hoven ghesaeyet.
Tijt
Dese Peterselie bloeyet in Hoymaent/ ende levert huer saet in Oostmaent.
Naem
Dese vremde Peterselie wordt gheheeten in Griecx Petroselinon/ ende om dat sy veel in Macedonien wast Petroselinon Macedonicum. In Latijn Petrapium, Apium saxatile ende Petroselinum/ dat es in Hoochduytsch Stein Epffich oder Stein Peterlin. In Neerduytsch Steen eppe. In Franchois Persil des roches. Dese Eppe wordt oock van sommighen ongheleerden Apotekers ghenaemt Amomum. Hier te lande wordt sy gheheeten vrembde Peterselie. In Franchois Persil estrange. Ende dese Eppe/ es sonder twijfel die oprechte Peterselie die naer die plaetse daer sy meest wast Peterselie van Macedonien ghenaemt wordt.
[649] Dese Eppe es werm ende drooghe tot schier in den derden graedt.
Cracht ende werckinghe
A Tsaet van dese verweckt die natuerlijcke cranckheyt van den vrouwen/ het doet water maken/ ende breeckt ende doet lossen den steen ende dat graveel met der urinen.
B Dit selve saet sceydt oock alle winden ende gheneest mits dyen die pijnen weedommen ende crimpselen van der maghen ende van den buyck. Item es oock seer goet ghebruyckt tseghen alle coude ghebreken van der sijden/ nieren ende van der blase.
C In alle Teriakale compositien ende die dat water doen lossen es dit saet oock goet vermenght.