1554/1557: Barbaraea, Cardamum hybernum, Herba Sanctae Barbarae, Herbe de Saincte Barbe, Kersse (Winter-), Nasturtium hybernum, Pseudobunium, Sankt Barbarakraut, Steencruyt
Dit cruyt heeft gruene vette breede effene rondachtighe bladeren/ den bladeren van Eppe oft van Kersse niet seer onghelijck/ maer meerder ende breeder. Sijn stelen sijn ront in veel steelkens boven verdeylt/ daer aen wassen vele cleyne geele
[669] bloemkens/ ende daer naer cleyn langhe ronde hauwkens/ daer in cleyn sadeken besloten groeyet. Die wortel es dick ende lanck.
Plaetse
Dit cruyt wast op die velden/ ende oock in sommighe moeshoven/ ende op ongheboudeplaetsen.
Tijt
Dit cruyt es meest alle den winter duer gruen/ maer in Meye ende Braeckmaent zoo bloeyet ende leveret sijn saet.
Naem
Dit cruyt wordt gheheeten in Hoochduytsch S.Barbara kraut/ ende daer naer in Latijn S.Barbarae herba/ ende van ons Barbaraea. In Franchois Herbe du saincte Barbare. In Hollant ende in sommighe plaetsen van Brabant wordt dit cruyt gheheeten Winter kersse/ om dattet tswinters voor kersse met den saladen gegheten wordt/ ende daer naer worddet oock ghenaemt Nasturtium oft Cardamum Hybernum. Sommige gheleerde houwen dit cruyt voor Sideritis latifolia oft Scopa regia.
Natuere
Dit cruyt es werm ende drooghe tot in den tweeden graedt volcomelick.
Cracht ende werckinghe
A Winterkersse es oock een goet salaet cruyt/ ende daerom worddet tswinters met den salade gelijck kersse gegheten/ ende dient daer toe oock seer wel/ gelijck die Kersse ende Rakette.
B Dit cruyt suyvert oock die vervuylde wonden ende sweeringhen/ ende neempt dat overtollich vleesch daer op gheleyt oft tsap daer af daer in ghedruypt.