[723] Die Spaensche brem heeft oock houten stelen/ ende daer uut wassen langhe dunne taeye rijskens/ die oft naeckt ende sonder bladeren sijn/ oft met seer cleynen bladerkens hier ende daer veerde van een beset. Die bloemen sijn geel den bloemen van den anderen Brem niet onghelijck/ ende den dien volghen oock hauwkens/ daer bruyn plat saet in leyt/ ghelijck aen den anderen Brem.
Plaetse
Dese Brem wast in Spaengien op dorre ende drooghe plaetsen/ hier te lande en wordt hy niet ghevonden/ dan alleen in der cruytliefhebbers hoven.
Tijt
Dese Brem bloeyet hier te lande in Braeckmaent ende oock spader/ in Oostmaent wordt sijn saet rijp.
Naem
Dese Brem wordt gheheeten in Griecx Sparton ende Spartion. In Latijn Spartum/ ende somtijts oock Genista/ van den cruytliefhebbers nu ter tijt Genestra Hispanica. In Neerduytsch Spaensche Brem.
Natuere
Spaensche Brem es werm ende drooghe van natueren.
Cracht ende werckinghe
A Die bloemen ende saet van den Spaenschen brem ontrent een vierenCruijdeboeck deel loots swaer inghenomen met huenich water/ doen
overgheven ende braken met ghewelt ghelijck wit Niescruyt/ maer sonder perikel ende sonder sorghe.
B Tsaet alleen inghenomen doet camerganck hebben/ ende iaecht daer duer af veel waterachtighe ende slijmachtighe vochticheden.
C Die rijskens in water gheweyckt ende dat tsap daer uut ghedouwt oft gheperst/ een cleyn crooskens ghedroncken/ es goet den ghenen die de squinantie/ dat es swillinghe met hitte ende pijne in die kee |