Deel 6 Van der boomen, haghen, ende alle houtachtighe gewassen, en van huerder vruchten, gummen ende sapen ondersceet, fatsoen, naem, natuere, cracht ende werkinghe PlantenAlfabetisch
Dit ghewas groeyet in maniere van cleyne struycxkens oft boomkens/ ende en wordt niet seer groot/ sijn bladeren sijn breet ende diep ghesneden/ minder dan die Wijngaerts bladeren/ anders huer wat ghelijck. Die bloemkens sijn geel/ in
[735] dmiddel purpurbruyn/ rontsomme ghekertelt. Die vruchten sijn schier ghelijck breede platte ghebaerde noten/ die vol sijn van schoonen witten Cottoen/ in den welcken dat saet verborghen leyt.
Plaetse
Cottoen wast in Egypten ende in Indien/ ende wordt oock gheplant in Candien/ Malthen/ ende andere dyerghelijcke landen.
Naem
Cottoen wordt ghenaemt in Griecx Xylon ende Gossipion/ ende dijsghelijcx in Latijn Xylum ende Gossipium. In die Apoteke Cotum, Bombax, ende Bombasum. In Hoochduytsch Baumwol/ dat es in onse tale Boomwolle.
Natuere
Tsaet van Cottoen es werm ende vochtich als Serapio scrijft.
Cracht ende werckinghe
A Tsaet van Cottoen versuet den hoest/ ende es goet tot alle coude ghebreken van der borsten/ het sterckt die cracht/ ende vermeerdert dat manlick saet.