Deel 6 Van der boomen, haghen, ende alle houtachtighe gewassen, en van huerder vruchten, gummen ende sapen ondersceet, fatsoen, naem, natuere, cracht ende werkinghe PlantenAlfabetisch
Juiuben sijn oock vruchten van boomen ghelijck die Sebesten/ ende dese vruchten sijn ront ende langachtich/ een Olijfken schier niet onghelijck/ maer veel mindere/ van verwen wit oft root/ van smaecke suet/ die als sy langhetijt bewaert worden/ heel dorre ende vol rimpelen worden/ ende in elck van desen vruchten leyt een hert langachtich steenken/ van fatsoene den Olijfsteenen niet onghelijck/ maer veel mindere.
Plaetse
Juiuben wassen in werme landen/ als in Italien/ ende sommighe andere ghelijcke landen.
Naem
Dese boom wordt in Latijn van Columella Ziziphus ghenaemt.
Die vruchten worden gheheeten Zizipha/ In die Apoteke Iuiubae/ In Hoochduytsch Brustbeerlin. Ende worden van Galenus in Griecx Serica ghenaemt als sommighe meynen.
Natuere
Juiuben sijn middelmatich werm ende vochtich van natueren.
Cracht ende werckinghe
A Juiuben voor spijse inghenomen sijn quaet om verteeren/ ende voeden seer luttel/ maer in electuarien syropen oft andere medecijnen ghebruyckt/ zoo versueten sy die rouwicheyt van der keelen borste ende longhene/ ende sijn goet tot den hoest.
B Juiuben sijn oock in der selver manieren bequaem den lendenen nieren ende blase die verhit/ versworen/ oft van eenighe scerpe soute humueren te lijden hebben.